NAGA CITY- Pigsaysay kan sarong abogado na dakula an posibilidad na dae maimplementar sa nasyon an pambansang minimum wage system.
Sa entrevista kan Bombo Radyo Naga ki Atty. Chelsea Liao Ariza, Labor and Property lawyer, sinaysay kaini na maagi pa sa masusing proseso asin pag-aadal an paghurot na kaipuhang ipantay an pigswe-sweldo kan mga obrero sa ibang mga rehiyon sa pigswe-sweldo kan mga obrero sa National Capital Region.
Sigun ki Ariza, pighihiling kan magkakanigong ahensiya kan gobierno an manlaen-laen na factors kada lokasyon.
Dugang pa kan abogado, mas hababa an minimum wage sa probinsiya kun ikukumparar sa Metro Manila huli ta mas dakol an komersyo asin mas mahal an barakalon.
Alagad marurumduman, enot nang pigsaysay kan nagkapirang grupo kan mga obrero sa nasyon na kun susurion, haros pantay-pantay naman an cost of living sa bilog na Pilipinas.
Kaya man pangapudan kan saindang lado na magkaigwa nin pambansang minimum na sweldo para sa gabos kan mga obrero na katampad kan pigswe-sweldo kan mga nasa Metro Manila.
Kaipuhan nin sarong kantedad na mabuhat sa Family Living Wage na nakatalaan sa P1,161/aldaw asin kun anuman an kakulangan na existing wage levels an dapat man na kinakaipuhan na idugang na kantedad tanganing maabot an Family Living Wage.
Mientrastanto pigsaysay pa ni Ariza na kun magigubuhan nin paagi kan gobierno pwede man na mai-konsederar an nasambitan ng lakdang alagad maagi pa soboot ini sa halawig na proseso.
Sa ngunyan, pigsaysay na sana kan abogado na dapat magkaigwa nin bastanteng kaaraman an publiko dapit sa mga batas na nag-iiral sa nasyon tanganing maproteheran an saindang mga derechos.
