NAGA CITY- Nagin matrayumpo an pigkundusir na Unity Walk, Interfaith Rally asin Peace Covenant Signing sa PNP Provincial Office kan Camarines Sur.
Sa nagin paghampang sa mga kagawad kan media ni Provincial Director PCol Virgilio Olalia Jr kan CSPPO, sinaysay kaini na nagin satisfactory an aktibidad nin huli ta kadakol an nakisumaro asin yaon an saindang presensiya para sa event na pigkundusir katakod kan nararaning eleksyon sa bulan nin Mayo.
Sigun ki Olalia, an kadakol na attendees an nagpapahiling sana na nakikisumaro an gabos na mga kandidato asin mga tawong imbwelto sa obheto na magin sarong honesto asin makabuluhan an 2025 midterm elections.
Dugang pa kan opisyal nagpapahiling pa ini na igwang pagrespeto an kada saro sa nag-iiral na demokrasya sa nasyon asin pagsierto na mayong kariribukan na mangyari.
Pigsaysay pa ni Olalia na importante na an gabos na mga kandidato siringman an publiko an nagsusunod sa Rules asin Guidelines kan Comelec tanganing dae man mabugtak sa alanganin na sitwasyon.
Mientrastanto, pigheras man kan Provincial Director na igwang tolong banwaan an nasa irarom kan orange category ini an Ragay, Tinambac asin Presentacion.
Sa nasambitan ng mga lugar, mayo man nahihiling na presensiya kan armed groups na pwedeng magkrian nin kariribukan alagad pigsierto kan opisyal na yaon an saindang pagmonitor tanganing magtinir na salbado an mga tawo sa lugar.
Sa ngunyan, hagad na sana ni Olalia an pakikisumaro kan gabos tanganing magin matuninong an ikukundusir na elections.
