Pigkwesyton kan saro sa mga abogado ni Senador Ronald “Bato” dela Rosa an sa desisyon kan PNP Firearms and Explosives Office (FEO) na kanselaron an mga lisensya kan senador para sa labing sanggatos na badil.
Sa pamahayag ni Atty. Israelito Torreon na sala an pagsarig kan PNP sa Republic Act 10591 huli an pigtutukoy sana kaini iyo an rekisitos sa pagkua nin lisensya asin bako an cancellation.
Malinaw suboot na sinasabi sa ley an basehan kan pagbawi kan lisensya sa badil asin dae kabali an pagkakaigwa sana nin pendienteng kaso.
Nanindugan man si Torreon na mayo nin conviction si Dela Rosa asin mayo man nin orden hale sa arin man na korte sa Pilipinas na kanselaron an saiyang lisensya sa armas.
Tinatsaran man ni Torreon an soboot paggamit kan National Bureau of Investigation (NBI) kan warrant kan International Criminal Court (ICC) bilang basehan, mantang nag-iinsistir na an ICC bakong parte kan satuyang korte sa irarom kan ley.
Nakakahadit suboot na si Dela Rosa pigkokonsidera ngonian na “armado asin delikado” mantang hinahalean kan legal na deretso na magdara nin armas.
Liwat na sinabi kan kampo kan senador na dae pa nareresolberan kan Korte Suprema kun pwedeng i-enforce an ICC warrant sa Pilipinas, kun kaya dae dapat i-prejudge kan ehekutibo an desisyon kan korte.
