NAGA CITY- Pigtawan duon kan sarong abogado na an House Bill 11211 o an Death Penalty for Corruption Act o prosopwestong mapataw nin kapadusang kagadanan sa paagi kan firing squad sa mga opisyal kan gobierno na mahahatulan kan Sandiganbayan sa mga kasong graft and corruption an maikokonsederar na sarong unconstitutional.
Sa entrevista kan Bombo Radyo Naga ki Atty. Abelardo Quilaton Jr, sarong Legal Practitioner, sinaysay kaini na bawal an nasambitan ng prosopwesto nin huli ta pupuonan ini nin legal asin ethical issues.
Sigun pa ki Quilaton, antes man na makalusot an bill mangangaipuhan ini nin comprehensive legal framework orog ta na mas halangkaw an constitution kaysa sa batas.
Dugang pa kan abogado, dae maikokonsederar na heinous crime an korapsyon asin maikokonsederar na an death penalty an sarong degrading asin inhuman na klase kan kapadusahan.
Pigtawan duon pa ni Quilaton na an pigsunad na bill an masairarom sa hararuman na debate sa house of congress nin huli ta nagbabayolar sa nakapalaman sa 1987 constitutions bill of rights.
Sa ngunyan, pigsaysay na sana kan abogado na nasa lehislador na an pagdesisyon kun ano an gigibuhon sa House Bill 11211.
