Maduon na pinahimutikan ni President Ferdinand Marcos Jr an mga pahayag na ginibong sentro kan pagsasanay kan terorismo an Pilipinas.
Simbag ini kan Presidente kasunod kan Bondi Beach mass shooting sa Australia kun saen 15 indibidwal an binawian nin buhay.
Naipamareta kaya na antes naganap an mass shooting gikan sa Pilipinas an mag-amang suspek.
Pighurot kan Punong Ehekutibo na haloy nang naghihiro an gobyerno tanganing buwagon an mga teroristang grupo asin mamantinir an katonionongan kan nasyon.
Sa ika-90 anibersaryo kan Armed Forces of the Philippines (AFP) sa Camp Aguinaldo, pigtawan-duon kan Presidente na bakong katanggap–tanggap an siring na salang paratang asin pigsierto an padagos na pagpapakusog sa kakayanan asin kapreparaduhan kan militar.
Pig-omaw man ni Marcos an kabayanihan kan mga pinarangalan na kawani kan AFP asin liwat na pinagtibay an suporta kan administrasyon sa kapakanan kan mga soldados, kaibahan an pag-aprubar sa Executive Order No. 107 na malangkaw kan base pay kan military asin uniformed personnel puon Enero 2026.
Sigun sa Presidente, padagos an mga lakdang na ini kan pasasalamat kan gobyerno ara-aldaw sa serbisyo asin sakripisyo kan AFP para sa nasyon.
