NAGA CITY-Maugmang pig-ako kan Pilipinas an pigpaluwas na patara-tara kan Group of 7(G7) leaders na nagkokondenar sa agresibong mga aksyon kan China sa disputed waters.
Kasabay kaini, nangapudan man an Pilipinas sa China na punduhon an pagbaluktot kaini kan katotoohan, mga peligrosong aksyon kaini, asin man an harassment laban sa mga barko asin Filipino personnel.
Sa sarong patara-tara na pig-isyu sa paagi kan Department of Foreign Affairs(DFA), pigsambit kaini na an joint statement kan G7 na kinababalihan kan mga liderato kan Italy, Germany, US, UK, Canada, France, asin Japan nagpapahiling kan saindang commitment para sa paninindugan sa rules-based international order asin rule of law sa manlaen-laen na parte kan kinaban.
Pigsambit man kan DFA na kasaro an Pilipinas sa bisyon kan G7 para sa pusog asin salbadong Indo-Pacific region asin naninindugan laban sa anumang mga aksyon na nagraraot sa pangkinabang seguridad asin kaayusan.
Dapat punduhon na man soboot kan China an provocative behavior asin pagbaluktot kaini sa mga katotoohan kabali na an pagsasaley asin pagpapautob nin domestic laws asin mga regulasyon sa legal nin pagkakansadiri kan maritime zones kan Pilipinas na pagbalgar sa international law.
Sa pagtatapos kan summit kan G7 sa Apulia, Italy, nagheras an G7 leaders nin maduon nin pagtutol sa anumang unilateral attempt tangani na baguhon an status quo sa disputed waters nin pwersahan o sapiritan.
