NAGA CITY-Nagtetenir na kumpiyansa an National Economic and Development Authority(NEDA) na maaabot kan Pilipinas an upper-middle income status sa 2025.
Paliwanag ni NEDA Secretary Arsenio Balisacan, haros harani na an Pilipinas sa threshold na $4516 na minimum tangani na mapabali sa upper-middle income countries.
Sigun pa sa sekretaryo, an gross national income(GNI) per capita kan satuyang nasyon o an kabilugang kantidad kan kwarta na natipon kan mga tawo sa nasyon asin mga negosyo kinakaipuhan sana na maglago nin 6.7% ngunyang taon.
Ginibo ni Sec. Balisacan an patara-tara sa ibong kan pagtalaga kan World Bank sa Pilipinas komo sarong lower-middle income country na may gross national income(GNI) per capita na $4,230 kan 2023, mas halangkaw kaysa sa $3,950 na nairehistro kan 2022.
Basado sa pinakahuring klasipikasyon, an mga nasyon na may gross national income per capita na nasa pag-ultanan kan $1,146 asin $4,515 maikokonsiderar na lower-middle income countries.
Sa ibong kaini sigun sa NEDA chief dai kaipuhan na baguhon an 6%-7% na target na paglago kan ekonomiya tangani na maabot an upper-middle income status.
Naglago soboot nin 5.7% an ekonomiya kan nasyon kan enot na kwarter kan 2024 na lamang soboot sa kadaklan kan kataraid tang nasyon sa Southeast Asia huli sa mas mabagal na household consumption asin paggastos kan gobyerno.
