ARAM baya nindo mga ka-Bombo, manunutaran sa siyudad kan Lutsk, Ukraine an sarong pambihirang “Soviet relic” na presenteng igwang kapot kan titulo komo pinakahalabang residential building sa bilog na kinaban.
Kilala sa tawag na “The Great Wall of China”, an dambuhalang istrukturang ini an igwang kabilogang laba na 2.75 kilometers asin nagsisirbing istaran kan labi 10,000 residente sa laog kan labi 3,000 apartments.
Pinuonan ining ipatindog kan taong-1969 sa panahon kan Soviet Union.
Inabot nin 11 taon antes natapos an proyektong idinesenyo kan mga arkitektong sinda R. G. Metelnitsky asin V. K. Malovitsa tanganing magkaigwa nin unique na “honeycomb shape” kun hihilingon gikan sa himpapawid.
Huli sa sobrang dakula asin hewas kan establisyemento, pigsasabing inaabot nin sarong oras an paglalakaw tanganing makaluwas digde.
Kan bagong patindog pa sana ini, madalas maligaw an mga bagong lipat na residente sa paghahanap kan saindang unit sa laog kan pirang semana, kaya kinaipuhan na magpautob nin espesyal na address system para sa lambang seksiyon.
Sa presente, alagad maski harayo ini sa front lines kan giyera sa Russia, nangangaipuhan an establisyemento nin matinding pagpapakarhay, kaya plano kan sarong local travel agency na gibuhon ining tourist attraction asin magtangro nin roof tours tanganing makalikom nin pondo para sa maintenance kaini.
