Aram baya nindo mga ka-bombo, makukua sa siyudad kan Lutsk, Ukraine an sarong pambihirang “Soviet relic” na presenteng igwang kapot na titulo komo pinakahalabang residential building sa bilog na kinaban.
Bistado ini sa apod na “The Great Wall of China” na kun saen an dambuhalang istrukturang ini an igwang kabilugang laba na 2.75 kilometers asin nagseserbeng istaran kan labi sa 10,000 residente sa laog kan labi 3,000 apartments.
Pinuonan ining ipatindog kan 1969 sa panahon kan Soviet Union.
Inabot nin haros11 taon antes natapos an proyektong pigdesenyo kan mga arkitektong sina R. G. Metelnitsky asin V. K. Malovitsa tanganing magkaigwa nin unique “honeycomb shape” enkaso pighihiling gikan sa ere.
Huli sa labing dakula asin hewas kan edificio, pigsasabi na pig-aabot nin sarong oras an paglakaw tanganing makaluwas digde.
Kan bagong tindog pa sana an pirmeng nawawara an mga bagong balyo na residente sa paghahanap kan saindang unit sa laog nin pirang semana kaya kinaipuhan na magpautob nin spesyal na address system para sa kada seksiyon.
Sa presente, alagad maski harayo ini sa front lines kan giyera sa Russia, nangangaipuhan an edificio nin labing pagpapakarhay kaya plano kan sarong local travel agency na gibuhon ining tourist attraction asin magtangro nin roof tours tanganing makatipon nin pondo para sa maintenance kaini.
