Aram baya nindo mga ka-Bombo, sarong Italian mechanic an nakabilog nin pinakamakitid na kotse gikan sa luma kaining Fiat Panda.
Si Andrea Marazzi, sarong aking mekaniko asin YouTuber, an nagtagama nin sarong taon tangani gibuhong “ultra-thin” an sarong 1993 Fiat Panda.
Sa lapad na 50 centimeters, kasya sana an mismong driver kaini asin an sasarong headlight. Nagin sentro ini kan urulay online asin inapod na “Flat Fiat.”
Gamit an haros gabos nin orihinal na piyesa kan kotse, tiniyaga ni Marazzi na mapakarhay, putulon, asin i-welding an kotse hasta sa magin makitid ini. Fully electric na man an kotse na may langkaw na 145 cm, laba na 340 cm, asin man timbang na 264 kilos.
Bako ining pangkarerang lunadan, an top speed kaini an nasa 15 km/h sana, asin man kaya sana na makapaglakbay nin 25 km sa sarong charging cycle nin baterya.
Dae ini aprubadong gamiton sa tinampo; kaogmahan man sana soboot asin tangani mapansin an negosyo ni Marazzi na sarong junkyard.
Huli sa kasikatan kan saiyang proyekto, plano ngunyan ni Marazzi na mag-apply sa Guinness World Records tangani matawan ini nin titulong “narrowest car”.
