NAGA CITY – Nagpapadagos ngunian an imbestigasyon kan mga otoridad sa nadukayang piniridasong lawas kan sarong tao sa banwaan kan Libmanan, Camarines Sur.
Sa entrevista kan Bombo Radyo Naga ki P/Staff Sgt. Emyrose Organis, tagapagtaram kan Libmanan-PNP, sinaysay kaini na nagkapirang residente kan Barangay Potot an nakarisa sa nagpapataw-pataw na sako sa salog na sakop kan nasambitan ng lugar.
Kan buksan soboot an sako, duman na nahiling kan mga residente an nagkapirang parte kan pinutol na lawas.
Mientrastanto, sigon ki Organis, nadukayan man sa kataed na barangay an saro pang sako kunsaen duman nakabugtak an payo asin nagkapira pang parte kan lawas kan biktima.
Padipisilan man soboot an pagbisto sa biktima huli ta haros dae naman mabisto an lalawgon kaini.
Sa ngunian, sigon ki Organis, dinara na sa semeteryo an nasambitan ng parte kan lawas huli sa mabata ng parong kaini.
