Padagos na pigbisto an mga Pilipinong atleta sa bilog na nasyon, asin piglalaoman na magigin tampok pa man sa International Sports Scene.
Kaibahan sa magigin premirong pandok kan nasyon si Alex Eala asin Carlos Yulo, na parehong obhetong mas higit magtrayumpo sa maabot na torneo.
Kasunod kan mga historyang trayumpo, kaibahan na an saiyang enot na round win sa US Open, nakatutok ngunyan si Alex Eala sa sarong magayon na kawat sa 2026.
Kun saen nakatalaan ini maglaban sa WTA 250 Auckland ASB Classic, Autralian Open, asin WTA 125 Philippine Open na ikukundusir sa nasyon.
Mawot kaining palawakon an saiyang trayumpo, orog na pagkatapos manggana kan gintong medalya sa Southeast Asian Games, para sa Pilipinas sa women’s singles.
Apwera kaiyan Si Carlos Yulo man, sarong two-time world champion, mapadagos sa saiyang pagpepreparar para sa Asian Games asin mga gymnastics competitions.
Kaibahan sa saiyang mga plano an para sa 2028 Los Angeles Olympics, na pigkokonsederar na importante an saiyang performance sa FIG Artistic Gymnastics World Championships sa Rotterdam, Netherlands kan Oktubre.
Mientrastanto, an Gilas Pilipinas liwat nakatalaan na maglaban sa FIBA World Cup Qualifiers kontra sa Australia asin New Zealand puon Pebrero hasta Marso, asin qualifying windows sa Hulyo, Agosto, asin Nobyembre.
Makalihis an matrayumpong SEA GAMES, nag-arangkada an atleta kan Pilipinas sa Asian Games, kun saen nakamit kan nasyon an apat na gintong medalya asin dakol pang medalya kan 2023 sa Hangzhou, China. Obheto ngunyan kan mga atleta na liwat makapag-qualify asin mabulsa an kapangganahan sa masunod na kumpetisyon.
