Naikurit an enot na dayuhang nagadan sa Mt. Everest ngunyan na 2025 makalihis na bawian nin buhay an sarong Pinoy mountaineer sa Camp IV mantang nagpepreparar tanganing maabot an tuktok kan pinakamhalangkaw na bundok sa bilog na kinaban.
Ini an 45-anyos na si Eng. Philip Santiago II na parte kan Mountaineering Association of Krishnanagar- Snowy Everest Expedition 2025.
Pigkumpirmar kan pamilya ni Santiago an mamundong bareta.
Nag-aperlar man an kaparientes kan nagadan na Pinoy nin privacy sa panahon kan saindang pagdadalamhati.
Kan sarong aldaw, nakapagheras pa nin post sa social media si Santiago kun saen pig-anusyar kaini na nasa huring yugto na sinda kan pag-sakat sa Mt. Everest.
Dae pa sierto sa ngunyan an kawsa kan pagkagadan ni Santiago alagad, naggigibo na nin paagi an saiyang team members tanganing maibaba asin madara sa base camp an lawas ni Santiago.
Sigun sa Department of Tourism kan Nepal, ini an enot na naikurit na pagkagadan kan sarong dayuhang climber sa Mt. Everest para sa presenteng climbing season. Naenot nang naireport na duwang Sherpa support staff an nagadan makalihis na dapuan nin helang sa base camp asin pigdara sa HAMS Hospital.
Marurumdoman, an Camp IV an makukua sa “Death Zone” kan Everest, sarong delikadong parte kan bundok na may manipis na oxygen asin grabing lipot, rason kun tano labing delikado an lambang lakdang pasakat nin summit.
