Naabala an biyahe kan pirang mga bus sa Parañaque Integrated Terminal Exchange (PITX) na pasiring Bicol sa nakalihis na mga aldaw huli sa magabat na bulos kan trapiko dara kan naraot na Andaya Highway sa Camarines Sur.
Sigun ki PITX spokesperson Jason Salvador, nas 62 gikan sa 113 biyahe kan mga bus an naantala kan nakalihis na aldaw nin Huwebes asin nas 10 pang trips an naantala kan nakalihis na Biyernes.
Huli digde, naapektaran an labi 2,000 na pasahero.
Sa ibong kaini, pigsierto ni Salvador sa mga biyahero na kun kinakaipuhan nakapreparar an saindang stakeholders na mag-deploy nin dugang na bus units na pwedeng isyuhan kan Land Transportation Franchising and Regulatory Board (LTFRB) nin special permits.
