NAGA CITY – Nagtutubod an nagkapirang mga senador na nagsasadit na an kinaban ni dismissed Mayor Alice Guo asin nagdadangadang na an panahon na maarestar ini kan mga otoridad.
Si Senador Loren Legarda asin Senador Sherwin Gatchalian an naggibo kan pahayag makalihis an matrayumpong pagdakop sa saiyang tugang na babae na si Sheila Guo asin sa saiyang business partner na si Cassandra Li Ong.
Paliwanag ni Legarda, mapadagos an hearing kan upper house of congress manungod sa mga bagay na imbwelto an dating alkalde, partikularmente an pagkakaimbwelto ni Guo sa isyu kan iligal na operasyon kan POGO Hub sa nasyon.
Katuyuhan suboot kan imbestigasyon na mamantenir an eksistensiya kan hustisya asin rule of law kan nasyon.
Katakod kaini, kumpiyansa man si Gatchalian na dae makakatago asin makadulag si Guo sa mga krimen na suboot saiyang ginibo. Dugang pa kaini an matrayumpong pagbalik ni Ong asin Sheila Guo sa nasyon sarong turning point sa paghanap nin tunay na hustisya.
Pigsierto man kaini na mahampang sa hearing kan senado si Shiela Guo asin Ong huli ta igwa sindang outstanding arrest warrants.
