Pwede pang magluya pa an piso sa P62 hasta P64 kada dolyar enkaso maghaloy an giyera sa Middle East asin padagos na maglangkaw an presyo kan petrolyo, segun sa MUFG Bank.
An piso buminagsak na sa record low na P60.748 kan Marso 31. Segun sa bangko, posibleng maglampas an piso sa P61:$1 sa ikaduwang kwarter kan 2026 kun dae magluya an kariribukan sa Middle East asin maglangkaw an presyo kan petrolyo sa $120 hasta $140 kada bariles.
An krisis nagkaigwa nin dakulang epekto sa Strait of Hormuz, sarong mahalagang ruta nin lana sa bilog na kinaban. Nin huli ta an Pilipinas nagsasarig sa imported oil, direktang apektado an ekonomiya kaini kun nag-iitaas an presyo.
Nagpatanid an MUFG na kada $10 na paglangkaw kan presyo kan lana pwedeng magpaluway sa ekonomiya kan Pilipinas asin maglangkaw an inflation. Kun ini madagos, posibleng maglampas an implasyon sa 4% na target asin mapiritan an Bangko Sentral ng Pilipinas na magpataas nin interest rates.
Apwera diyan, pwedeng maapektaran man an presyo kan kuryente, pagkakan, asin transportasyon, siring man an mga remittances hali sa Middle East kun saen dakul na mga Overseas Filipino Workers (OFWs) an nagtatrabaho.
Sa suway na forecast, sinabi kan United Overseas Bank na posibleng umabot sa P61.5 kada dolyar an piso sa ikaduwang quarter antes makabawi nin diit sa mga masunod na bulan.
Sa ibong kan negatibong pananaw, an mga eksperto nagsabi na an mga pamumuhunan sa imprastraktura asin renewable energy makakatabang na mapakusog an ekonomiya asin mabawasan an epekto kan mga krisis sa maabot na panahon.
