Naghirit an grupo kan transportasyon sa Land Transportation Franchising and Regulatory Board (LTFRB) na aprubaran an dugang na ₱1 provisional na dagdag sa pamasahe para sa primerong apat na kilometro kan biyahe sa jeep.
Obheto kan pangapudang ini na mabawan an epekto kan padagos na paglangkaw kan presyo kan krudo, piyesa, asin gastusan sa pagpapamantinir kan mga pampasaherong jeep.
Sigun ki Ramon Guevarra, Presidente kan Jaen Nueva Ecija Transport Corporation, kinakaipuhan na an dagdag-pamasahe dara kan dagos-dagos na paglangkaw kan gastusan sa maintenance tangani masierto an kasalbaduhan asin kaayusan kan mga jeep sa tinampo.
Sigun pa sa transport group kabali sa mga gastusang ini an mga piyesa, baterya, asin magin an mga gulong.
Katakod kaini, sinang-ayunan ni Melencio “Boy” Vargas, Presidente man kan Alliance of Transport Operators and Drivers Association of the Philippines (ALTODAP), an pangapudan asin pigtawan duon an parehong rason.
An ALTODAP an saro sa mga grupong nagsunad kan petisyon para sa dagdag-pamasahe kan nakalihis na bulan nin Agosto kan presenteng taon.
Sa saindang petisyon, hinagad kan ALTODAP sa LTFRB na gibuhong permanente an ₱1 provisional na dagdag na inaprubaran kan nakalihis na Oktubre 2023, asin man aprubaran an saro pang provisional na dagdag tangani maibsan an pagkalugi kan mga operator asin tsuper kawsa kan paglangkaw kan presyo kan krudo asin maintenance.
Sa presente, an minimum na pamasahe sa tradisyunal na jeep an ₱13 para sa primerong apat na kilometro, mantang ₱15 man sa modernong jeep.
Enkaso inaprubaran kan LTFRB an dugang na provisional na dagdag, magigin ₱14 an pamasahe sa tradisyunal na jeep asin man ₱16 sa modernong jeep.
Pigtawan-duon nina Guevarra asin Vargas na kinakaipuhan na an dagdag-pamasahe sa panahong ini, orog na ta an huring pag-aprubar kan LTFRB an kan Oktubre 2023 pa.
Huli sa implasyon asin iba pang salik na nagpapalangkaw kan presyo kan mga pangenot na barakalon, pighurot kan duwang lider kan transportasyon na importante an tabang kan gobyerno sa anyo kan dagdag-pamasahe para sa mga tsuper asin operator
