NAGA CITY- Pigkiradan ngonyan kan Condor- Piston Bicol an mga paghuhuma ni presidente Rodrigo Duterte sa mga driver asin operators kan mga pampasaherong jeep enkaso magpadagos pa an mga ini sa pagmamatigas sa PUV modernization program kan gobyerno.
Sa entrevista kan Bombo Radyo Naga ki Joel Piliogo, coordinator kan Piston-Bicol, prangkang sinaysay kaini na dae makatarungan an mga binutasang pahayag kan presidente huli ta dae man suboot pasil para sa mga sararadit na linyada nin operators asin drivers na maribayan an saindang mga unit.
Sigon ki Piliogo, bakong gabos na pampasaherong jeepney sa nasyon mga luma na asin nakakaraot sa kapalibotan.
Bukas man suboot an mga operator asin drivers na iremodel an saindang mga bihikulo imbes na i-phase out an mga ini.
Apwera digdi, mawot sana ninda na dangugon sinda kan gobyerno para maintindihan kan mga ini an saindang agrangay.
Marurumduman na tinawan na sana ni presidente Rodrigo Duterte na hasta katapusan na sana kan taong 2017 an mga drivers asin operators kan mga pampasaherong jeep para mag-utob sa modernization program.
Apwera digdi, pig-agyat man kan presidente an transport group asin mga progresibong grupo na maggibo nin sarong bulan na hiro protesta para maipaabot an saindang pagkontra sa nasambitang programa kan gobyerno.
