Nagin garo pelikula an inot na laban sa pagpoon kan 2026-2027 NBA Regular Season kan Oktubre 21 matapos makagibo an Detroit Pistons nin matrayumpong comeback kontra sa Boston Celtics.
Binura kan Pistons an 22-point deficit asin nakua an 8-point na kapangganahan sa pagtapos kan laban, 121-113.
Sa pagtapos kan halftime, kapot pa kan Boston an 13-point lead, 58-45, sa pangengenot kan bagong forward kan koponan na si Paul George.
Alagad, marikas na nawara an double-digit lead kan Boston huli ta tulos ining naibaba sa anom na puntos sa pagtapos kan 3rd quarter.
Sinundan pa ninda ini nin 18-0 run sa 4th quarter asin tulos na nakua an 7-point lead.
Dai na nakahabol pa an Boston sa ibong kan paghingoa kan koponan, asin sa huri, namatian kaini an 8-point loss sa kamot kan mga bagitong Pistons.
Sa pagkadaog kan Boston, nalimitahan sana si Jayson Tatum sa anom na field goals hale sa 23 na saiyang binutasan asin sa pagtapos kan laban, 13 points sana an nagibo niyang i-ambag.
Nagin magayon man an debut ni George sa Celtics asin nakapuntos nin 38 points sa laog sana nin 31 mins na pagkarawat. Nakakua man siya nin 5 steals.
Para sa nangganang koponan, pare-parehong nakagibo nin 20-point performance an mga bagitong Pistons na sinda Cade Cunningham, Duncan Robinson, asin Jalen Duren. Nagin dakulang tabang man an 19 points na inilaog kan bench na si Javonte Green na nagkarawat sana sa laog nin 17 mins.
Ini an inot na kapangganahan kan Pistons asin inot na pagkadaog kan Boston ngunyan na season.
