NAGA CITY- Marhay na bareta para sa mga Pilipino na yaon sa Estados Unidos an pagkakaigwa nin ceasefire sa pag-ultanan kan Israel asin Iran.
Marurumduman, pig-anunsyar ni U.S. President Donald Trump ngunyan na aldaw an kompletong ceasefire sa pag-ultanan kan Israel and Iran, na pighihiling na potensyal na paagi tanganing tapuson an 12-aldaw na giyera.
Sa report ni Bombo International News Correspondent Vellie Dietrich Hall gikan sa US, sinaysay kaini na nagbunga soboot an paglalapigot ni Trump na ibusol an katuninongan sa nasambitan ng Rehiyon.
Sa paagi soboot kaini, mapapababa an tensyon sa Middle east na makakatabang sa bilog na kinaban orog na ta kadakol an naapektaran kaini.
Sigun pa ki Hall, panahon naman tanganing iprayoridad an pag-urulay dapit sa pangkinaban katuninongan kan mga nasyon na imbwelto sa kariribukan tanganing malikayan na orog pang maglangkaw an numero kan binabawian nin buhay.
Marurumduman pa, antes an pag-anunsyar kan US President sa ceasefire pinauranan kan Iran nin mga short-range asin medium range ballistic missiles an Al Udeid Air Base sa Qatar.
Katakod kaini, pigsaysay pa ni Hall na sa mga siring na sitwasyon nahihiling an kusog kan US sa pag-enkaminar sa mga nasyon sa bilog na kinaban na dae pwedeng mang-bully nin iba asin mantiniron an katuninongan sa kanya-kanyang rehiyon.
Mientrastanto, naglalaom na sana si Hall na sa paagi kan planong ceasefire na ini sa pag-ultanan kan Israel asin Iran dagusang matuldukan an kariribukan sa nasmabitan ng lugar para sa karahay kan gabos na mga apektado.
Sa ngunyan, padagos man na nakabantay an mga Pilipino sa Amerika sa development asin sitwasyon sa Middle East asin preparado na mag-utob sa anuman na panundunan na piglatag kan saindang gobierno.
