NAGA CITY– Pigklaro ni Deputy House Speaker Fredenil Castro na mayong dapat na ipaghandal an namamanwaan enkaso mapagtibay an planong pagpauktaba kan Barangay asin SK election asin pagnombra na sana kan mga magigin lider sa kada barangay.
Sa eksklusibong entrevista kan Bombo Radyo Naga ki Castro, sinaysay kaini na pabor siya sa plano ni Presidente Rodrigo Duterte na ipauktaba na muna an pirilian sa maabot na Oktubre asin magnombra na muna nin mga otoridad na paramientras na mamamayo sa mga barangay.
Sigon ki Castro, mayo nin dapat na ikahandal an publiko huli ta dae man maaapektaran an diretsos kan mga tao na magboto huli ta dae man soboot hahaleon an eleksyon sa nasyon, imbes paramientras munang ipapauktaba an pirilian para tawan nin dalan an paglilinig sa kada barangay urog na an mga embwelto sa iligal na droga.
Sa ngunian, an kaipuhan soboot na gibuhon kan presidente, iyo an tawan nin klaro an mga proseso sa pagpili nin mga ibubugtak na temporaryong opisyal para dae mapuli sa problema an nasambitan ng lakdang.
