NAGA CITY- Nakapagrehistro an PNP Anti-Cybercrime Unit nin halangkaw na porsyento kan online selling nin paputok kan nakalihis na Pasko asin Bagong taon.
Sa entrevista kan Bombo Radyo Naga ki PCPT. Angelo Babagay kan PNP Anti-Cybercrime Unit sinaysay kaini na haros kadaklan sa mga pigpapabakal kan nakalihis na pasko asin bagong taon an dae mga regulated na klase kan paputok siring kan boga asin plapla.
Katakod kaini, magkakasunod-sunod na entrapment operation an pigkundusir kan mga otoridad sa may parte kan siyudad nin Naga, Sorsogon magin sa probinsiya kan Camarines Sur. Sigun pa sa opisyal sa Camarines Sur, igwang tolong entrapment operation an pigkundusir kun saen nahampang sa magkakanigong kapadusahan an nadakop na nagbalgar sa pigpapautob na ley.
Dugang pa ni Babagay, makalihis an pigkundusir na operasyon, nauntok na an pagpapabakal nin mga iligal na paputok sa paagi kan online.
Sa ibong na lado, kadakol man an nairehistro na kaso kan scam, mga naabusong indibidwal na nag-uutang online asin iba pang klase kan mga scam scheme na talamak sa panahon kan holiday season.
An mga nasambitan ng problema an padagos na pigtututukan kan mga otoridad asin padagos man an saindang pagbabantay tanganing masawata an mga ini.
Sa ngunyan, pig-abisuhan na sana ni Babagay an publiko na padagos na maglikay tanganing dae mabiktima kan mga mararaot na gibuhon sa presenteng panahon.
