NAGA CITY- Nakumpiskar kan Police Regional Office Bicol an nasa P80.1 million na kantedad kan iligal na droga asin naarestrar an nasa 644 drug suspects sa operasyon na pigkundusir puon Enero hasta Hunyo kan presenteng taon.
Sigun ki PRO-5 Director Brig. Gen. Andre Dizon sa enot na anom na bulan kan taon, sa 661 na anti-drug operations na saindang pigkundusir nasa kabilugang 80,461.81 grams kan marijuana asin 10,359.8174 grams kan shabu an saindang nasamsam.
Sa nasa 644 na suspetsado naarestrar, 37 an pigbisto komo high-value targets,142 komo street-level drug personalities, asin 465 komo newly identified drug personalities.
An pagkaka-arestrar man na ini an rason tanganing maisunad an nasa 662 criminal cases sa korte sa manlaen-laen na parte kan Rehiyon.
Katakod kaini, an Camarines Norte an nakapagrehistro nin pinakahalangaw na kantedad kan nakumpiskar na illegal drugs na nagkakantedad sa P30.27 million.
Ini an pigsundan kan Camarines Sur na igwang P24.32 million; Albay na igwang PHP12.19 million; Naga City na igwang P9.33 million; Masbate na igwang P3.55 million; Sorsogon na igwang P238,420.80, asin Catanduanes na igwang P181,879.60.
Apwera digde nagkundusir man an nasambitan ng hepatura nin nasa 62 anti-illegal gambling operations na nagresulta sa pagkaka-arestrar kan nasa 2,743 katawo sa manlaen-laen na dae otorisadong gambling activities.
Nakumpiskar kan mga kapulisan an nasa kabilugang P1.4 million komo bet money asin nakapagsunad nin nasa 875 criminal cases kontra sa mga suspetsado.
Katakod kan nasambitan ng mga operasyon, pigsierto kan opisyal na padagos an saindang pagsusog sa mga tawo na padagos man an pagbalgar sa ley tanganing padikit-dikit na mabawasan an problema kan komunidad.
