NAGA CITY- Naarestrar kan Police Regional Office Bicol an nasa 31 indibidwal asin nasamsam an nasa P21.2 million na kantedad kan illegal na droga puon Hunyo 9 hasta 15.
Sigun sa nasambitan ng hepatura an mga naarestrar na indibidwal an kinababalihan kan walong high-value individuals, 22 na street-level suspects, asin sarong newly identified drug personality.
An 23 na operasyon sa nasambitan ng peryodo nagresulta sa pagkakakumpiskar kan nasa 1,718.428 grams kan shabu, 80,101.50 grams kan dried marijuana leaves, asin 100 grams kan hybrid marijuana na bistado komo kush.
Kabali sa mga dakulang operasyon an pagkakasamsam kan nasa 80 kilos kan dried marijuana na igwang kantedad na nagpapakol sa labi P9 million, kabali na an 100 grams kan “kush” sa Milaor, Camarines Sur.
Sigun ki PRO-5 Director Brig. Gen. Andre Dizon na an pagkakaarestrar kan mga indibidwal na padagos na naiimbwelto sa iligal na droga an patotoo na padagos an saindang kampanya kontra sa mga iligal na aktibidad.
Dakula soboot an epekto kaini sa komunidad orog na sa mga kajovenan na padagos nindang pigpoproteheran gikan sa mga pigpapangalad na bulong tanganing dae masayang an saindang mga buhay.
Sa ngunyan, plano kan nasambitan ng hepatura an pag-arangkada kan anti-drug education asin awareness campaigns sa mg eskwelahan asin komunidad sa bilog na Rehiyon.
