NAGA CITY- Padagos an paglalapigot kan mga personahe kan Libmanan MPS na magin drug cleared na an siyam na barangay sa saindang municipalidad.
Sa entrevista kan Bombo Radyo Naga ki PSMG Juan Batolina, PCAD, PNCO kan Libmanan MPS, sinaysay kaini na dae nag-uuntok maglibot, magmonitor asin mag-atender nin asembliya an saindang lado komo lakdang tanganing masawata na an mga indibidwal na padagos na nagbabalgar sa ley asin naiimbwelto sa iligal na droga.
Sigun pa sa opisyal, padagos man an saindang pagtutok sa mga jovenes asin iba pang mga personalidad tanganing mabantayan an hiro kan mga ini.
Dugang pa ni Batolina, dakula man na lakdang an saindang pag-atender sa mga pagtiripon kan barangay tanganing maipasabot o maipaabot sa publiko an maraot na epekto kan iligal na droga sa buhay kan sarong tawo.
Kasabay kaini, pig-orgulyo pa man kan opisyal na nagin dalan man an pagkakaigwa nin Balay Silangan sa saindang lugar tanganing maibulsa kan saindang banwaan an Seal of Good Local Governance award.
Mientrastanto, apwera sa droga, liwat man na pinagirumduman ni Batolina an publiko na magin malikay orog na ngunyan na papaabuton na an Holiday Season.
Dae soboot pagpabayaan an saindang mga harong na mayong tawo asin likayan an pag post sa FB kan saindang mga kalawakan tanganing magin salbado sa mga mararaot an boot.
Sa ngunyan, hagad na sana kan opisyal an kooperasyon kan gabos tanganing magin matuninong an komunidad.
