Nagtitinir na nakaalerto an Philippine National Police (PNP) sa bilog na nasyon magpuon sa panahon kan Pasko hasta sa pag abot kan Bagong Taon 2026.
Ini an tangani masierto an kasalbaduhan asin seguridad kan publiko sa tahaw kan mga pagselebrar.
Sigun ki acting PNP Chief Police Lieutenant General Jose Melencio Nartatez Jr., nagin matrayumpo an pagkundusir kan siyam na aldaw kan Simbang Gabi.
Mayo soboot nairehistrong ano man na insidente na nakaapektar sa katrangkiluhan asin kasalbaduhan kan mga nagsimba.
Labi kaining pig omaw an dedikasyon asin pagsirbi kan mga kapulisan sa pagmamantinir kan seguridad sa mga simbahan asin sa saindang pagpapautob nin mga ley. Siringpaman, pigtawan duon ni PLtGen. Nartatez na magigin mas sibot pa an PNP sa panahon kan Pasko asin Bagong Taon kumparar sa Simbang Gabi.
Ini an huli sa nilalaomang paglangkaw kan mga insidente na may koneksyon sa paggamit kan paputok asin iba pang klase nin firecrackers.
Huli digde, inatasan na man an gabos kan mga istasyon kan pulisya sa bilog na nasyon na pahiguton an saindang kampanya laban sa iligal na pagsasadiri asin pagpapabakal nin armas, pati man an mahigot na pagbabawal sa mga iligal na paputok.
Kaiba man sa direktiba an pagtutok sa online na bentahan kan mga ini, tangani mas mapugulan an pagkuriyat kan mga peligruso na produkto.
