Bigong makakua nin DNA profile an Philippine National Police (PNP) Forensics Group sa mga butong narekober kan Philippine Coast Guard (PCG) technical divers sa Taal Lake sa Batangas.
Sa sarong pulong balitaan sa Kampo Krame, ipighayag ni PNP Spokesperson PBGen. Jean Fajardo na nagin challenging para sa forensics group an paghahanap kan DNA profiles gikan sa mga buto na iyong na-submerged nin haloy na panahon sa irarom kan lawa kan Taal.
Dakula man soboot an posibilidad na contaminated na an mga buto makalihis na mababad sa irarom kan lawa na apat na taon rason tanganing masakitan na makahanap an mga otoridad kan mga DNA samples gikan digde.
Alagad maski mayong nahanap na DNA profiles sa mga buto gikan sa lawa, pigkumpirmar man ni Fajardo na igwang matalong DNA profiles an napag-araman sa mga butong nahanap sa sarong sementeryo sa Batangas.
Gikan soboot sa tolong bangkay, naberepika na igwang DNA profiles na gikan sa duwang lalaki asin sarong babae.
Kasunod kaini, nagnegatibo man an mga DNA samples sa cross matching na gikan sa 23 kaparientes kan mga nawawarang sabungero na iyong mga nagtugot na magamit an saindang mga DNA komo mga references para sa cross matchings.
Mientrastanto, liwat man na nangapodan an tagapagtaram kan Pambansang Pulisya sa mga iba pang kaparientes kan mga nawawarang sabungero na pwedeng makapagtao kan saindang mga DNA samples tanganing magamit na reference sa mga masunod pang cross matching.
Paliwanag pa ni Fajardo, bukas asin pighayag man kan saindang kabuhan sa publiko an kondisyon asin magin an estado kan mga nakuang mga kasulotan kan mga posibleng biktima an tulos na ipagtaong-aram sa saindang opisina tanganing maisairarom sa DNA samples asin cross matching.
Sa presente, padagos man an Pambansang Pulisya sa pakikipagtabangan sa Department of Justice (DOJ) para sa ikareresolba kan kaso kan mga nawawarang sabungero.
Piglalaoman man na mapadagos an pagkakasar kan search and retrieval operations an PCG sa Taal Lake hasta sa malibot ninda an bilog na katubigan asin masierto na mayong malilingawan sa imbestigasyon kan kaso.
