NAGA CITY- Nagpatanid an mga otoridad sa publiko na maglikay urog na tuyong igwa nin mga namamatean na mga pag-uuran, pagkikilat asin pagdadaguldol.
Ini enkoneksyon sa duwang soltero na binawian nin buhay makalihis aksidenteng tamaang nin kikilat sa Purok 3, Barangay Maulawin, Sta. Elena, Camarines Norte.
Sa entrevista kan Bombo Radyo Naga ki P/Capt. Henrich Villaluz, hepe kan Sta. Elena-PNP, sinaysay kaini na enkaso naririsa na kan mga tao na iba na an kondisyon kan panahon, dapat na dae na muna an mga ini magluwas saindang mga harong nganeng malikayan na an mga siring na insidente.
Marurumduman na kan nakaaging semana sana kan binawian nin buhay an magpinsan na sinda Jimboy Lura asin Jericho Lura, parehong 18-anyos.
Sigon ki Villaluz, nagluwas soboot an duwa nganeng maghanap nin makusog na signal sa bulod na parte kan lugar para makakawat kan online game alagad aksidenteng tinamaan kan kikilat na nagin resulta kan saindang pagkagadan.
