NAGA CITY- Nailatag na suboot kan Philippine National Police (PNP) an mga counter measures kaini makalihis na ipasairarom sa Category 2 kan election watchlist areas kan Commission on Election (Comelec) an 18 mga barangay hale sa Libmanan, Camarines Sur.
Sa entrevista kan Bombo Radyo Naga ki P/Supt. Errol Garchitorena, hepe kan PNP Libmanan, sinaysay kaini na nagkaigwa na sinda nin mga meetings kaibanan an mga representante hale sa Philippine Army asin Comelec para masierto na magigin mahigot an pagbabantay sa 18 mga lugar na kabale sa election watchlist areas na kadaklan suboot yaon sa upper barangay.
Inaaram pa man suboot ninda hasta sa ngonyan ano sa mga barangay na ini an dapat na tutukan asin pinagplanuhan naman an magigin deployment kan mga pulis asin soldados.
Tinawan doon ni Garchitorena na an mga lakdang na ini para masierto na magigin matuninong an gigibuhon na May 14 barangay asin Sangguniang Kabataan (SK) Elections sa saindang banwaan.
Sa ngonyan, nagtitinir pang normal suboot an sitwasyon sa Libmanan asin mayo pang nairehistrong insidente nin pang-aabuso o pananakot sa mga kandidato.
Napag-araman na maisasairarom sa Category 2 an sarong lugar kun igwa digding presensya suboot nin armadong grupo na pwedeng makiaram sa pirilian.
