Nakatalaang magtalaga nin labi sa 100,000 na kapulisan an Philippine National Police (PNP) para sa nilalaomang dagsa kan tao ngunyan na semana para sa holiday exodus.
Sigun ki Acting PNP Chief PLtGen. Jose Melencio Nartatez Jr. na obheto kaini na mabantayan an mga terminal, transport hubs asin iba pang mga lugar na nilalaomang dadagsaon kan publiko tangani magpautob ni seguridad asin siertuhong salbado an mga mananakay na masiulian ngunyan na Pasko asin Bagong Taon.
Mas pinahigot man an seguridad kumparar sa nakalihis na taon kun saen an deployment an dae mababa sa 60,000. Paliwanag ni Nartatez, an saindang deployment an nakabase sa kun ano man an presenteng sitwasuon sa mga komunidad asin mga tinampo sa nasyon kun saen pigtawan duon kaini an kapansin-pansin na paglobo kan numero kan mga tao.
Mientrastanto, pig asegurar man ni Nartatez na an saindang mga pulis an nakaantabay asin preparadong rumesponde bako sana sa mga terminals asin tinampo alagad magin sa mga business asin residential areas na mawawalat kan publiko sa bilog na panahon na ini.
Nangapudan man an Pambansang Pulisya sa publiko na makisumaro man sa pagmamantinir kan kaayusan asin kasalbaduhan sa panahon na ini sa paagi kan pagpapautob kan kanya-kanyang mga safety measures.
