NAGA CITY – Padagos an pagkundusir kan Philippine National Police (PNP), kan COMELEC Gun Ban sa banwaan kan San Jose, Camarines Sur.
Sa entrevista kan Bombo Radyo Naga ki PCPT Mark Spaña, Officer-in-Charge kan San Jose Municipal Police Station, sinaysay kaini na maski pa mauran, padagos an saindang pagkukundusir nin checkpoint para sa Gun Ban. Kun saen, kasubagong pagkaaga, nagkaigwa soboot sinda nin Joint PNP and COMELEC Checkpoint kabila na an Philippine Army, asin Coast Guard sa Poblacion Area kan banwaan.
Sigun ki Spaña, magigin visible an saindang mga personahes paluwas asin palaog sa nasambitan ng banwaan. Obheto kaini an tanganing magin salbado asin matuninong an isasagibong 2025 Local and National Election.
Katakod kaini, sa presente mayo paman sindang nairehistro na nagbalgar sa nasambitan ng gun ban.
Mientrastanto, dakula man an pasasalamat kan opisyal sa pakikipagkoordinar sa mga kagawad kan media tanganing mas maiheras o an pagdidisiminar nin impormasyon sa mga motorista manunungod sa pagbabawal kan pagdadara nin mga mayong lisensyang badil, asin iba pang deadly weapon.
