NAGA CITY- Padagos pa ngonyan na pighahanap kan mga otoridad an limang mga persona na pigtutukdong suspetsado sa nangyaring pambabadil sa sarong paraoma sa banwaan nin Sipocot, Camarines Sur.
Binisto an mga suspetsado na sinda Albert Clemente; an magtugang na sinda Melchor asin Ariel Arcilla siring man an magtugang na sinda Dante asin Andrew Garaña.
Sa nakuang impormasyon kan Bombo Radyo Naga, napag-araman na naaktuhan kan biktima na si Serafio Boringot, 46-anyos an limang mga suspek mantang nagluluto suboot nin copras na pigkua sa umahan kan biktima.
Bigla na sanang binadil kan suspek na si Clemente an biktima na nagresulta sa pagsapo kaini nin lugad sa manlaen laeng parte kan saiyang lawas. Tulos man na pigdalagan sa Sipocot District Hospital alagad kinaipuhan na ibalyo sa Bicol Medical Center (BMC) sa ciudad nin Naga an biktima para sa mas maipabulong.
Sa presente, padagos an operasyon kan PNP para madakop an nagdurulag na limang mga suspetsado na pigsangatan na nin kasong frustrated murder asin qualified theft.
