NAGA CITY- Padagos pa nanggad an pigkokondusir na imbestigasyon kan mga kapulisan tanganing mahanap an election officer kan banwaan nin Sta Elena, Camarines Norte na sinasabing haros duwang semana ng nawawara.
Sigon ki PO2 Antonio Tiongson, hale sa PNP Sta Elena, sinaysay kaini na nagpapadagos an saindang imbestigasyon tanganing mahanap si Oda Asis an election officer sa nasambitang banwaan.
Huri suboot na nahiling sa terminal sa barangay Poblacion an biktima, hapon kan nakaaging Agosto 2.
Pasiring kuta na si Asis sa Daet tanganing mag-atendir sa sarong meeting kan Commission on Election (Comelec) alagad dae na suboot ini nakaabot sa nasambitang banwaan asin dae naman nakapuli pa sa pigdadagusan kaining apartment sa Sta Elena.
Sigon ki Tiongson, Agosto 4 na kan magpasiring sa saindang hepatura an mga kaparyente ni Asis tanganing i-report na nawawara ini asin dae na ninda ini ma-contact.
Saro sa mga pighihiling na anggulo ngonyan kan kapulisan an posibilidad na na -depress suboot si Asis makalihis na magadan an saiyang ina.
Sa ngonyan, nakikipagtabangan na an PNP Sta Elena sa iba pang mga hepatura kan kapulisan sa probinsya nin Camarines Norte tanganing mahanap an nawawarang election officer.
