NAGA CITY- Full force na an pagbabantay kan PNP Pamplona sa pagbabantay sa papaabuton na Bagong Taon.
Sa entrevista kan Bombo Radyo Naga ki PCPT Monica R San Juan, Acting Chief Of Police, Pamplona Municipal Police Station, sinaysay kaini na alertado na sinda tangani na magtaong seguridad sa komunidad.
Sigun ki San Juan, pigdedeploy man ninda an Mobile Patroling tangani na masiguro an mga kahimanwang nagluluwas, may mga importanteng kalakawan o mabakal nin kun anong mga kaipuhan ngunyan na may kasiributan.
Komo pagmanehar sa trapiko, igwa ning nakatagamang personnel sa parte kan Maharlikay Highway asin regular an saindang pigkukundusir na check point tangani na mapagirumduman an mga motorista sa seguridad sa saindang pagmamaneho.
Nagkakanigo kaya na naka-kondisyon an mga lunadan asin mga sadiri antes na mag byahe tangani na malikayan an ano man na aksidente sa tinampo.
Saro sa mga karasunan kan mga siring na aksidente iyo an mechanical errors, mga pagigin ireponsableng driver kun minsan, na kun saen dawa na nasa implwensya nin arak, nagpipiririt man giraray na mag drive.
Sa ibong na lado, mahigot na pigpapagirumdom pa kan opisyal an paggamit kan mga authorised na firecrackers sa mga lugar na salbadong paggamitan nin paputok, kun saen dapat na harayo sa mga tawo tangani na dae makadanyar sa iba.
Sa ngunyan, hagad pa kaini na magin salbado asin matuninong an pagsabat kan Bagong Taon kan gabos na mga kahimanwa, magin alerto asin mapagmatyag man giraray sa kapalibutan orog na ta mainit sa mata kan kawatan an mga siring na kasiributan huli ta nahihiling ninda ining opurtunidad tangani na mang salisi.
