NAGA CITY- Pigklaro kan Philippine National Police (PNP) an naenot na nagluwas na mga bareta na igwang nagsabog na improvised explosive device (IED) sa banwaan nin Labo, Camarines Norte na nagresulta sa pagkakairido kan apat na mga soldados.
Sa entrevista kan Bombo Radyo Naga ki P/Supt. Juancho Ibis, hepe kan PNP Labo, sinaysay kaini na nagkaigwa nin bakbakan sa pag-ultanan kan mga suldados hale sa 9th Infantry Battalion, Philippine Army asin kan pigkakarkulong sampulong mga miyembros kan rebeldeng New People’s Army (NPA) sa barangay Dumagmang sa nasambitang lugar.
Sigon saiya, naghaloy nin haros 20 minutos an riribayan nin putok sa pag-ultanan kan duwang lado.
Apat na mga suldados man an nagsapo nin menor na lugad huli sa nangyaring bakbakan mantang padagos pang inaaram kan mga otoridad kun igwang nairido sa lado kan mga rebelde.
Pigtawan doon man ni Ibis na mayong nagsabog na IED sa lugar asin nakarekober sana kan mga otoridad an pinagtutubudang mga landmine.
Sa ngonyan, nagpaparahay na sa ospital an mga nairidong soldados mantang padagos pa nanggad an pigkokondusir operasyon kan Philippine Army katakod kan pangyayari.
