Masunod soboot an Philippine National Police (PNP) sa kasuguan kan korte na pahampangon si dismissed Bamban, Tarlac Mayor Alice Guo sa pagdangog sa Senado sa Lunes, September 9, 2024.
Sigun ki PNP Public Information Office (PIO) chief Police Colonel Jean Fajardo, komo pag-utob sa kasuguan kan korte an mahigot nindang susunudon an security protocol sa pagdadara ki Guo sa Senado gikan sa PNP detention facility.
Pigsaysay pa ni Fajardo, bastanteng numero kan mga pulis an magdadara asin mag-e-escort ki Guo pasiring nin Senado sa Lunes.
Marurumduman, kinatigan kan Capas Tarlac Regional Trial Court (RTC) Branch 109 an kahurutan ni Senator Risa Hontiveros na paatenderon si Guo sa nakatalaan na pagdangog kan Committee on Women, Children, Family Relations and Gender Equality sa Lunes pasado alas-diyes nin aga.
Piglalaoman na gigisahon si Guo kan mga senador katakod kan saiyang mga naaaraman na dapit sa illegal POGO operations sa Tarlac.
