NAGA CITY- Pigpuonan na kan Philippine National Railways an pagpapakarhay asin pag-upgrade kan south main line.
Ini an susog naman sa kasuguan ni Presidente Marcos Jr na tawan prayoridad an pagpapahewas kan Bicol railway puon Laguna hasta sa Quezon siringman sa bilog na Rehiyong Bicol.
Katakod digde, an pagpapakarhay target na matapos ngunyan na 2025 asin piglalaoman na magigin operational sa 2026.
Marurumduman, duwang mayor na commuter lines an nag-o-operate, ini an sa rutang Calamba to Laguna asin Lucena to Quezon, siringman sa Bicol an Naga to Sipocot asin Naga to Legazpi.
Dugang pa digde, nakumpleto naman an pagpapakarhay sa Binahan Bridge sa Ragay, Camarines Sur kan nakalihis na June 16 na nagkokonektar sa Sipocot to Ragay.
An Sipocot-Ragay section an piglalaoman na magin operational sa third quarter kan presenteng taon mantang an Lucena to Gumaca asin Ragay to Tagkawayan an naka-schedule na magbukas sa huring quarter kan taon.
An Gumaca-Hondagua-Tagkawayan segment an partial na liwat mabukas sa huring parte kan taon.
Sa ngunyan, padagos an ginigibong pagtatrabaho sa lado kan PNR tanganing makapagtao na nin serbisyo sa publiko an mga proyekto kan gobierno.
