NAGA CITY – Mapakol sa poco mas o menos P747,000 an pig-distribwer kan Philippine Crop Insurance Corporation(PCIC) para sa 15 Barangay sa banwaan nin Calabanga, Camarines Sur.
Sa nagin paghampang sa mga kagawad kan media ni Adonis Aguilar, Municipal Councilor kan lokal na gobyerno kan Calabanga, pig-imbitaran soboot ini kan Municipal Agriculture Office kan banwaan komo Chairman kan Committee on Agriculture and Fisheries kan Sanggunian Bayan, katakod kan pag release kan crop insurance para sa 15 barangays.
Basado soboot sa inisyal na impormasyon na saindang nakua sa Philippine Crop Insurance Corporation, nasa 133 na benepisyaryong para-oma an makakaresibe kan pagbabarangaan na poco mas o menos P747,000.
An kagayonan soboot sa programang ini, libre an insurance na pigtatao kan PCIC, asin kaipuhan sana na mag-rehistro sa Municipal Agriculture Office.
Kaipuhan man kan mga para-oma na i-insure an saindang mga ka-omahan, partikularmente an mga maisan, tanganing enkaso dai maray an ani o igwang kalamidad na mangyari, insured an saindang mga tanom.
Kabali sa mga nabenepisyaran an mga hale sa Barangay Burabod, Kinale, Tumagodtod, Harubay, Pinada, asin Balombon.
Sigun pa ki Aguilar, an lokal na gobyerno kan Calabanga dakul nin programa para sa mga para-oma asin mga parasisira.
Pig-eenkaminar man kaini an mga nasa sektor kan agrikultura na mag-bisita sa Municipal Agriculture Office tanganing maaraman an saindang kinakaipuhan tanganing makabali sa mga benepisyo na kaipuhan nindang makua hale sa gobyerno nasyonal.
