Piglalaomang mahagad an Poland nin dugang na assets kan Amerika na ipapadara sa border kaini sa Ukraine.
Ini an makalihis na laugon na man kan Russian drones an airspace kan Poland kan nakalihis na Miyerkules, Setyembre 10.
Sa sarong statement, kinumpirmar man ni Poland President Karol Nawrocki na nagkaulay sinda ni US President Donald Trump kasunod kan incursion kan drones kan Russia.
Kaibahan sa mga posibleng hagadon kan Poland sa kaalyado kaining Amerika iyo an deployment kan US Patriot battery sa border.
Enot digde, liwat na pigdeploy kan US an nasambitan ng battery na nasa Rzeszow, an pinakadakulang siyudad sa southeastern Poland sa manlaen-laen na lugar asin an presenteng nag-o-operate sa border iyo an asset kan Germany.
Presente man na pighahalat kan Poland an binakal kaining F-35 fighter jets kun saen nasa inisyal na apat an piglalaomang maabot sa Enero.
Mientrastanto, nakapreparar man an European Union na magpataw nin dugang na sanctions package kasunod kan Russian drone incursion sa Poland.
