NAGA CITY- Pigtawan duon kan sarong Political Analyst na an Kalayaan Islands Group an dae pwedeng itao sa iba huli ta pagsasadiri ini kan nasyon.
Sa entrevista kan Bombo Radyo Naga ki Atty. Michael Henry Yusingco, Political Analyst, Senior Research Fellow at the Ateneo Policy Center, sinaysay kaini na haloy na an occupation kan Pilipinas sa nasambitan ng isla asin igwa nang claim an nasyon na pigrerekognisar kan kinaban.
Sigun pa ki Yusingco an usapin sa Kalayaan Island Group an dae dapat subject sa debate huli ta pagsasadiri ini kan Pilipinas.
Paliwanag pa kan abogado, an Pilipinas an enot na nakapag claim sa nasambitan ng isla asin nakapatindog nin komunidad kun kaya dae pwedeng ipaubaya sa China siring kan nagin pahayag ni Senator Rodante Marcoleta.
Dugang pa ni Yusingco, an usapin dapit sa exclusive economic zone an nagsesentro sa katubigan o kadagatan na iba man sa kadagaan o mga isla.
Mientrastanto, dapit man sa pigkakasang debate ni Marcoleta igwang pagkahadit digde an publiko huli ta nagpapahiling sana ini na dae solido an lambang mga Pilipino sa usapin kan Sovereign rights.
Magkakaigwa soboot nin impresyon an China na dae nagtitindog komo sarong nasyon an mga namamanwaang Pilipino tanganing depensaran an derechos kan Pilipinas.
Aram naman kan mga Pilipino na pagsasadiri kan Pilipinas an Kalayaan Islands Group kun kaya dae na kaipuhan pang pagdebatehan ini kan mga kapwa Pilipino.
Sa ngunyan, hagad na sana ni Yusingco na magkasararo an gabos na mga Pilipino para sa pagdepensar sa pagsasadiri kan nasyon.
