NAGA CITY – Labing nakakaraot sa gabos na aspeto an Political Dynasty.
Sigun ki Atty. Michael Henry Yusingco (Political Analyst, Senior Research Fellow At The Ateneo Policy Center), sinaysay kaini na saro sa labing naaapektaran iyo an ekonomiya kan nasyon, demokrasya orog na sa lipunan.
Manunutaran man sa mga nangyayari sa presente na kun saen haros mayo nin nagigin progreso an mga pigsasagibong mga imbestigasyon sa Kongreso, Ombudsman asin ICI.
Sigun ki Yusingco kadaklan sa mga imbweltong contractors sa maaanomalyang flood control projects iyo an gikan sa mga Political Dynasties asin sinda mismo an mga pasimumo kan mga ghosts asin substandard na proyekto.
Katakod kaini, yaon sa taumbayan an pagsakit, sinda an labing nagsasapo asin naaapektaran siring kan labing pagbaha asin iba pang kalamidad na nagkakawsa nin pagkaraot kan mga kabuhayan asin pagkagadan.
Mayo na soboot makakasayuma na an katotohanan na kinakampang sa ngunyan iyo an nakakaraot talaga an Political Dynasties.
Dakula an pagtubod kaini na an mahewasang korapsyon an talangang konektado sa Dinastiyang Pampulitika orog na ta kadakol na nin pag-aadal na nagpapatunay kaini.
Pigsaysay pa ni Yusingco na an pagriribay nin Liderato sa kamara asin senado an para saiya dae nakakatabang na malabanan o maresolbaran an ano man na katiwalian.
Nagrribayan sana nin mga lalawgon alagad pare-parehas man sana na mga Dynastic.
Dae nakakamaray asin mayo nin naidadarang pagbabago dawa papano an nasambitan ng Rigodon o pagriribayan nin mga posisyon o liderato sa pirang sangay kan gobyerno. Sa ngunyan, hagad pa kan opisyal an pag abot kan panahon na maplantsa na an ano man na gusot na nangyayari sa nasyon na labing nakakaapektar sa namamanwaan.
