Posibleng maipit an pondo kan Department of Migrant Workers (DMW) asin Overseas Workers Welfare Administration (OWWA) sa 2026 kun dae masisimbagan kan mga ahensya an pauru-utro na kaso kan pagmamaltrato sa mga overseas Filipino workers (OFW).
Sa pagdangog kan Senate Committee on Migrant Workers kan nakalihis na Miyerkules, sinaysay ni Senate Committee on Migrant Workers Chairman, Senador Raffy Tulfo, tatablahon kaini an pondo kan mga ahensyang ini kun dae maaayos asin man matutuldukan an problema nin pang-aabuso sa mga kaharungan sa ibang nasyon.
Makamundo sana kaya na pigkokonsiderar na makabagong bayani an mga OFW, alagad napapabayaan an saindang mga kapakanan.
Hasta ngunyan, pasagos pa man soboot nag aabot sa saiyang tanggapan an mga reklamo dapit sa pang-aabuso sa mga OFW, orog na sa Middle East.
Sigun pa ki Tulfo, kun an mga OFW an nag aagi sa masusing pagsusuri antes na maipadara sa ibang nasyon, dapat man na magkakaigwa nin screening sa saindang magigin amo.
Kaipuhan na maberipika kun nasa maayos na pag-iisip an employer asin man kun igwa ining malinig na rekord.
Pinapa asegurar man senador sa DMW asin OWWA na magkaigwa nin annual check-up sa mga OFW sa saindang host country tangani masierto na nasa maayos sindang kamugtakan.
