Nagtagama an Gobyerno kan syudad nin Naga nin pondo para sa mga proyekto sa drainage system sa Barangay Abella, Naga City ngunyan na taon 2026.
Sa entrevista kan Bombo Radyo Naga ki Apolinario C. Malana Jr., Barangay Abella, Ciudad nin Naga, sinaysay kaini na kabali digdi an ₱1.9 million na proyekto sa Sto. Niño Street asin an pagpapadagos kan drainage system sa Zone 4 na may budget na ₱400,000. Sa ngunyan, nasa bidding stage na an mga proyekto.
An saindang katuyohan iyo na mabawasan an pagbaha sa mga hababang lugar, orog na sa mga lugar na harani sa Bicol River, kun saen luway-luway na nag-uurong an tubig baha.
Aminado an barangay na bako man gabos na lugar mababaha, alagad igwa man nin nagkapirang lugar na nakakaeksperyensya nin pagbaha dawa maluya an uran. Saro sa katuyuhan kan mga proyektong ini iyo na mabawasan an epekto kan pagbaha sa mga apektadong residente.
