Pigbubusol ni Bagong Henerasyon Party-list Representative Robert Nazal na mailaog sa 2026 national budget an pondo para sa rehabilitasyon kan mga lugar na pigtamaan kan makusog na linog sa Cebu.
Sigun ki Nazal, siring sa mga naenot na Kongreso kaipuhan masierto kan Kamara na igwa nin alokasyon tanganing maibuhat an mga nadanyarang komunidad kaibahan an mga nagrasay na simbahan asin iba pang istraktura.
Pigkalampag man ni Nazal an Department of Human Settlements, Department of Public Works and Highways (DPWH), asin Department of the Interior and Local Government (DILG) na siertuhon an kasalbaduhan kan publiko sa paagi kan liwat na pagtitindog sa saindang mga harong asin mga kaipuhang imprastraktura.
Sigun ki Nazal, sa mga masurunod na semana o bulan hahagadan ninda nin governance and business continuity measures an mga magkakanigong ahensiya kan gobierno para sa pagbuhat kan mga naapektarang barangay asin mga banwaan.
Bilog man an suporta ni Nazal sa anuman na lakdang kan Kamara tanganing matabangan an mga biktima kan trahedya.
