Nagtalikod na sa kinaban si Pope Francis ngunyan na aldaw, Lunes, Abril 21, 2025 sa edad na 88 mantang ini nasa Vatican’s Casa Santa Marta.
Si Pope Francis, ipinangaki komo Jorge Mario Bergoglio kan Disyembre 17, 1936 sa Buenos Aires, Argentina, aki kan mga imigranteng Italyano. Antes ini maglaog sa seminaryo, nagklase ini komo chemical technician asin nagtrabaho sa industriya sa pagkakan. Sa edad na 21, nagkaigwa ini nin malubhang pneumonia na nagresulta sa paghali kan parte kan saiyang toong baga.
Kan taong-1958, naghali ini sa Jesuit novitiate asin nagklase nin humanities sa Santiago, Chile. Ini an nagin padi kan Disyembre 13, 1969, asin kan taong-1973, ginibo kaini an saiyang perpetual vows sa Society of Jesus. Ini man an nagin Jesuit provincial kan Argentina puon 1973 hasta 1979.
Komo Archbishop kan Buenos Aires kan taong-1998, bistado ini sa saiyang simpleng pagbuhay, nakaistar sa sarong sadit na apartment asin naggagamit nin pampublikong transportasyon.
Ini man an nagin Cardinal kan taong-2001 sa irarom ni Pope John Paul Ii. Kan Marso 13, 2013, ini an na-elihir komo Santo Papa, an enot na Jesuit Pope, enot gikan sa Latin America, asin enot na bakong Europeo sa laog kan labi 1,000 taon.
An saiyang pamamayo an nakatuon sa mga isyung siring kan pagbabago kan klima, pagkakapantay-pantay kan yaman, asin pagtabang sa mga marginalized na sektor sa lipunan.
