Pigreport kan Vatican na nagtitinir na nasa kritikal na kondisyon alagad stable an kamugtakan ni Pope Francis na presenteng yaon pa man giraray sa ospital huli sa double pneumonia .
Kasabay kaini, padagos man an pagbulos kan pagpapangadyi kan mga Katoliko sa bilog na kinaban parasa tolos na recovery kan 88-anyos na Santo Papa.
Ini an an pandoseng aldaw na kan Santo Papa sa Rome’s Gemelli hospital.
Sigun pa sa doktor ni Pope Francis, mayong nahiling na acute respiratory episodes asin an saiyang hemodynamic parameters o an heart rate asin blood pressure an padagos na nagigin stable.
Marurumduman, pigdara sa ospital an pamayo kan Simbahang Katoliko kan nakalihis na February 14 huli sa kadipisilan na maghangos asin nagsasapo nin asthmatic respiratory attacks.
Kan nakalihis man na Martes, nagsairarom an Santo Papa sa scheduled follow-up CT scan para sa radiological monitoring kan bilateral pneumonia.
Sa ibong kan saiyang kritikal na kondisyon, an lider kan nasa 1.4 billion na mga Katoliko sa bilog na kinaban an padagos pa man giraray piggagampanan an saiyang tungkulin maski nagtitinir sa ospital.
