Makalihis an Angelus prayer sa St. Peter’s Square sa Vatican kasuodma, Enero 11, ipinagpangadyo kan lider kan Simbahang Katoliko an katoninongan sa Middle East partikular na sa Iran asin Syria kun saen nagpapadagos an tensiyon na padagos na naggagadan nin kadakol na buhay.
Ipinagpangadyi man kan Santo Papa na padikit-dikit, magin mabunga an diyalogo asin katoninongan para sa pag-abot kan pangkabilogang kamarayan kan bilog na lipunan.
Puon pa kan nakalihis na Disyembre kan nakalihis na taon, an Iran an nakakaeksperyensiya nin panibagong demonstrasyon laban sa regime, na nagkalat pa sa kadakol na probinsiya kan nasyon hasta sa napuli sa kariribokan kun saen nagpakol na sa 500 an napamareta na binawian nin buhay asin ipinangapodan an pagwawakas kan presenteng regime. Mantang sa Syria man, nakakaeksperyensiya nin mahewasang labanan sa mga nakalihis na aldaw sa tahaw kan army asin Kurdish forces sa northern city kan Aleppo.
Iniba man kan pontiff sa saiyang pangadyion an mga nagsasakit, mga naiipot sa giyera sa Ukraine asin liwat na binuhay an pangapodan para sa pagtatapos kan karahasan asin panibagong mga lakdang tanganing maabot an katoninongan.
Ginibo kan Santo Papa an pangapodan sa tahaw kan panibago man na mga pag-atake sa Ukraine partikular na sa mga primerong energy infrastructure an Ukraine sa tahaw kan paghigot kan malipot na panahon kun saen pinakaapektado digde an mga sibilyan.
