Inalerto na kan gobyerno kan Pilipinas an counterparts kaini sa Portugal asin iba pang mga nasyon tanganing matunton asin maibweltada na sa Pilipinas an nagbutas na si dating Ako Bicol Party List Representative Zaldy Co, na pigdeklarar ng sarong pugante.
Naenot ng isiniwalat ni Sec. Remulla na namonitor an huring lokasyon ni Co sa Portugal.
Sigun sa sektretaryo, gabos kan mga nasyon asin gabos kan centers for transnational crimes sa bilog na kinaban an naimpormaran na katakod sa pagkanselar kan pasaporte ni Co.
Pig-ako man ni Remulla na haloy asin maluya an proseso pag-abot sa international law, alagad nakikipag-koordinar na soboot sinda sa saindang counterparts.
Sa kampo man ni Co, naenot na kaining pinahimutikan an mga akusasyon kontra sa saiya asin imbes, pigtukdo si Presidente Ferdinand Marcos Jr., na nasa likod soboot kan P100 bilyong budget insertions sa 2025 national budget para sa infrastructure projects, na inapod man kan Palasyo Malacañang na mayong basehan asin pawang haka-haka sana.
Marurumduman, saro si Co sa 16 na akusado sa kasong graft asin malversation na igwang kinaaraman sa maanomalyang flood control projects sa Oriental Mindoro.
Gikan sa mga kapwa akusado ni Co, siyam digde an nasa kustodiya na kan gobyerno asin nag-plead nin not guilty sa Sandiganbayan.
