Luway-luway nang nagluluya an presenteng kamugtakan kan La Niña sa nasyon asin piglalaoman na ma-transition sa neutral phase ngunyan na Marso.
Sa intrevista kan Bombo Radyo Naga ki Ian Neil Nuñez (Officer-In-Charge, CBSUA-Pili AGROMET Station), saiyang sinabi na segun sa monitoring, igwa nin 75% na tsansa na magbago an kamugtakan hale sa La Niña pasiring sa neutral, asin na sa mga masunod na bulan, posibleng maeksperyensyahan an arog kan El Niño na epekto.
Ipinaliwanag kan mga eksperto na an El Niño parateng nagigin kawsa nin kakulangan nin pag-uran. Kun mangyari ini, an average na pag-uran sa laog nin tolong bulan pwedeng mas hababa sa normal na 50 milimetro kada bulan. Huli kaini, posibleng makaeksperyensya nin mas mainit na panahon asin mas halangkaw na heat index.
Dugang pa ni Nuñez na piglalaoman na posibleng magpoon nang mamatean an arog kan El Niño sa pag-ultanan kan Hulyo sagkod Oktubre. Sa panahon na ini, posibleng makamati nin halangkaw na temperatura asin nabawasan na pag-uran, na pwedeng makaapektar sa mga pananom arog kan paroy asin mais. Mantang nag-iitaas an temperatura, an mga imahe kan satelayt nagpapahiling man na an mga tinanom nagigin kayumanggi, sarong indikasyon nin stress sa mga tinanom huli sa kakulangan nin tubig.
Mientrastanto, pigbabantayan pa an posibilidad kan mga bagyo. Para sa Marso asin Abril, pwedeng maporma an bagyo kun mayo man maporma sa ibang semana. Sa Mayo, may posibilidad na magbilog nin bagyo sa laog o harani kan Philippine Area of Responsibility (PAR).
Dawa mayong malinaw na dry season sa nagkapirang parte kan Bikol, piglalaoman pa man giraray an pag-uran sa bilog na taon. Alagad, an nagkapirang lugar posibleng makaeksperyensya nin mas dakul na uran kun magpoon na an southwest monsoon o habagat makalihis an pagluya kan northeast monsoon o amihan.
Nagpagirumdom man an mga eksperto orog na sa mga estudyante asin may mga aktibidad sa luwas na likayan an labi-labing init puon alas 11 nin aga hasta alas 12 nin udto. Pigrerekomendar an paggibo nin mga aktibidad sa amay na aga o hapon, magsulot nin komportableng bado, asin pirming magdara nin tubig tanganing maibitaran an epekto kan labi-labing init.
An mga ahensya sa klima padagos na magtatao nin mga update tanganing mabantayan an mga pagbabagong ini sa panahon.
