Pigsugo kan Philippine Ports Authority (PPA) sa mga Port Management Office (PMO) na apektado kan destroso kan ST Pepito na i-relocate sa mga pantalan an mga stranded na pasahero.
Sa memorandum na ipinaluwas ni PPA General Manager Jay Santiago, pigmanduhan kaini an mga PMOs na makipagkoordinar sa mga lokal na gobyerno para sa pagtransfer kan mga stranded na pasahero.
Segun ki Santiago, mas marhay na ibalyo sa mas mahiwas asin ligtas na evacuation center an mga pasahero.
Pigsaysay kaini na mas tututukan man ninda an saindang kamugtakan sa mga evacuation centers huli sa regular na pagmonitor kan mga lokal na opisyales asin mga designadong ahensya na regular na nagtatao nin supplies.
Sa huring monitor kan nakalihis na aldaw nin Sabado, igwa nang 1,769 na pasahero, truck driver, asin cargo helper na natkoy kan Philippine Coast Guard na stranded sa mga pantalan.
Segun sa PPA, dawa ngani an management kan pantalan nakatao nin magkakanigong istaran para sa mga stranded na pasahero, kaipuhan man na magsairarom sa assessment asin mahiwas na inspection an mga pantalan katakod kan magkasunod na bagyo na nagtama sa nasyon, orog na an STS Kristine kun sain kadakol na mga Pasahero an na-stranded asin nagtinir sa manlaen-laen na pantalan sa laog nin nagkapirang aldaw.
Kabali sa mga pantalan na presenteng pigsasairarom sa inspeksyon iyo an mga nasa Northern Luzon, Batangas, Bicol, Quezon, Masbate, Mindoro, Palawan, Panay/Guimaras, Eastern Leyte/Samar, Western Leyte/Biliran, Bohol, Lanao del Norte, asin Iligan .
An siring na mga pantalan nagkaigwa man nin nagkapirang danyos arog kan mga putol na trangkahan, kudal, ilaw, asin atop.
Nin huli sa sunod-sunod na bagyong Kristine, Leon, Marce, Nica, asin Ofel, limitado sana an nagibong paghirahay mantang kinaipuhan na liwat na inspeksyunan an mga dati nang nahirahay kasunod kan epekto kan mga nakaaging bagyo.
